Louké

An fil-anmizi sosyété an nou la arèsté pwodui pou dévlopé sa nou pé kriyé "labitid konsonmé san travay", lèspwi a onpil moun koumansé chalviré pyé pou tèt. E sé asi sa Vali ka fouté. "Sosyété a konsonmé san travay" sé fwè jimo a lèspwatasyon a pèp gwadloupéyen : bèl vwati, bato pou pwonmné, dènyé modèl a tout bèl-bèbèl, eks... Vali ka montré on chofè ki ka goumé épi on dat, davwa loto a tala bay ta'y...
on ti griji ! Mi bab ! Konsidiré lavi a on nèg té tini mwens valè ki on mòso fè penn. Davwa alantou a tousa, travay a fègnan, lajan san fasé, malovant a achté ka pòté vyé mès, vyé moralité : lè'w gadé vorasité a détwa, ipokrizi é sitou jé bésé. Sa ki bèl osi an penti a Vali, i pa ka fèmé zyé asi jan pèp a'y ka palé, tanto kréyòl tanto fwansé. Vérité pa ka manti, Vali ka rèspèté sa i ka tandé, sa i ka vwè an wòl é plas a sé dé langann-lasa an sosyété gwadloupéyen-la.
E, an finaldikont, kon po a fouyapen ka kouvè kannari asi difé, Vali vlé ban nou fas é kouraj pou nou dévlopé langann kréyòl an nou pou nou pwan labitid li'y é maké'y. Mi sé sa Louké : apa ti chodyè ! Tito Déglas.