L'Ystoire du vaillant chevalier Pierre de Provence et de la belle Maguelonne

Le l'endemain a l'eure assignee que le noble Pierre n'avoit pas oublié, il trouva la porte ouverte ainsi comme le nourrisse luy avoit dit. Si entra en la chambre du Maguelonne en grant affection du cueur. Et quant Maguelonne luy vit, toute sa couleur luy mua et se changea comme couleur de roses, et se vouloit lever et l'aler embrasser et baiser, car Amours la contraignoit. Toutesfois Raison qui doit gouverner tout noble cueur luy remonstra son honneur et la dignité ou elle estoit, dont elle refraingnoit son couraige ring petit et sa contenance, non obstant que ses beaulx yeulx et sa belle face ne pouoient celer l'amour qu'elle avoit a Pierre. Et le cueur luy tresalloit au ventre moult doulcement. Et le noble chevalier Pierre ne changa pas moins couleur quant il vit l'incomparable beaulté de Maguelonne, et ne sçavoit en quelle maniere devoit commencer a parler, car il ne sçavoit s'il estoit en l'aire ou en terre, car ainsi fait Amours a ses subgetz.