Chronique anonyme du règne de Charles VI (1400-1422) - Tome 2, Texte original du ms BnF fr. 23018

"Fu mis le siége devant le chastel de Merk emprès Calaix, par le conte de Saint-Pol. Et au moix de may fu ledit conte combatu des Engloix, et furent toutes ses gens pris et desconffis, et y fut la desconffiture moult grande des gens de Picardie. Mais ledit conte s'en fuy et saulva hors de la bataille, bien hastivement, et laissa ses gens prendre et tuer en icelle. Et y furent pluiseurs Brans engiens perdus et menez en Engleterre.
En cel an, par le commandement et ordonnance du duc Loys d'Orléans fu secrètement menez hors de Paris Loys, ainsné filz du roy de France, lequel estoit duc de Guyenne et daulphin de Viennoix, et avoit espousée l'ainsnée fille du duc Jehan de Bourgongne. Et estoient conduiseurs dudit duc de Guyenne, Loyvs, duc de Bavière, frère de la royne et oncle dudit enffant, et Edouart de Bar, marquis du Pont, filz au duc de Bar.
Et estoit ledit enffant menez en ung chariot couvert, et ceulx qui le menaient tous en armez. Car il savoient le duc de Bourgongne estre sur les camps à grant puissance pour venir à Paris.